Na defensa da estabilidade laboral, pola convocatoria das oposicións no SPDCIF.

EN DÚAS SEMANAS SE RECOLLERON MÁIS DE 800 SINATURAS RECLAMANDO A INMEDIATA CONVOCATORIA DAS OPOSICIÓNS DE LABORAIS NO SPDCIF.

 Dentro da campaña iniciada pola estabilidade laboral e pola convocatoria das oposicións no SPDCIF, e logo das accións desenvolvidas nestas últimas semanas, dende a CIG e a CSIF non podemos máis que agradecer a súa participación a todos os compañeiros que se implicaron nos diferentes actos convocados; sexa asistindo a primeira asemblea de Silleda do pasado día 21 de Xuño, sexa asinando o escrito dirixido ao presidente da Xunta ou sexa participando na manifestación que se desenrolou o pasado Venres 14 de Xullo en Santiago de Compostela diante da Xunta de Galicia.

Asemade, dende a CSIF e a CIG salientamos o gran apoio recibido á campaña de recollida de sinaturas, que distrito a distrito e en apenas dúas semanas, acadou 802 sinaturas de traballadores do SPDCIF amosando o seu rexeitamento ás intencións da Xunta de Galicia de suprimir a quenda de acceso libre da Oferta de Emprego Público do 2016, e ao incumprimento do acordo de Bombeiros forestais no referente ó compromiso de convocatoria de prazas de persoal laboral do SPDCIF no período 2017-2020.

Dada a importancia cara o futuro da convocatoria inmediata das oposicións ás prazas de persoal laboral do SPDCIF, e sabedores da necesidade de seguir sumando traballadores/as a estas reivindicacións, dende a CIG e a CSIF manifestamos a nosa vontade de continuar a informar os compañeiros do SPDCIF da gravidade da situación na que nos atopamos e de seguir a loitar pola estabilidade laboral, na rúa e onde faga falta, ate conquerir o que consideramos de Xustiza para un colectivo como o SPDCIF que sufre -como repetimos ate a saciedade- unha taxa de temporalidade superior ao 40 por cento.